Amakuru
Amakuru
December 23, 2024Kuva ku itariki ya 12 kugeza ku itariki ya 29 Ugushyingo 2024, abagore bafashwa ba Bureau Social de Développement (BSD) binyuze muri gahunda yo kabaha inguzanyo iciriritse hagamijwe kubafasha gushyira mu bikorwa imishinga ibyara inyungu bahawe amahugurwa agamije kubngerera ubumenyi ku mitergurire y’imishinga.
Amahugurwa yahawe abagenerwabikorwa bo mu Murenge wa KAYUMBU wo mu Karere ka KAMONYI, Umurenge wa MUSHISHIRO wo mu Karere ka MUHANGA n’Umurenge wa CYANIKA wo mu Karere ka NYAMAGABE. Amahugurwa yitabiriwe n’abagore 282, ahi buri tsinda ryahugurwaga iminsi ine. [...]
Read more...
November 29, 2024Kuva ku itariki ya 1 kugeza ku ya 2 Ugushyingo, Bureau Social de Développement (BSD) yakoze ibiganiro by’isanamitima bigenewe abakobwa babyariye iwabo biga imyuga itandukanye mu ishuri ry’imyuga rya BSD.
Gahunda yo gufasha abakobwa babyariye iwabo, BSD yayitangiye mu mwaka wa 2021 ku bufatanye na Fondation MARGRIT FUCHS. Abakobwa bafashwa ni ababyariye iwabo ntibagire amahirwe yo gukomeza amashuri, kubera ingaruka zatewe no gutwara inda zitateganyijwe. Ubufasha bahabwa ni ukubigisha imyuga itandukanye yigishirizwa mu ishuri ry’imyuga rya BSD, kandi abana babo bakitabwaho mu irerero rya BSD aho bahabwa iby’ibanze umwana akenera mu gihe ababyeyi babo baba bagiye kwiga imyuga.
Intego y’ibiganiro ni ugufasha abo bakobwa gukira ibikomere batewe n’ingaruka zo guterwa inda batateganyije kandi bakiri bato, cyane cyane ibibazo byo kurera abana bonyine nta bushobozi bafite ndetse no kuba abenshi muribo bashyirwa mu kato n’umuryango. Ni muri urwo rwego BSD yahisemo kubafasha gukira ibyo bikomere binyuze mu biganiro by’isanamitima. Ibyo biganiro bakaba babihabwa buri ntangiriro y’umwaka w’amashuri, kuko byagaragaye ko ibyo bikomere bituma batakaza icyizere cy’ejo hazaza ndetse bigatuma batanakurikira amasomo neza mu ishuri.
Muri ibyo biganiro abakobwa babyariye iwabo biga mu ishuri ry’imyuga rya BSD bafashe umwanzuro wo kudaheranwa n’ibihe byahise ahubwo bagategura neza ejo hazaza habo. [...]
Read more...
June 27, 2024Mu imurikabikorwa ry’abafatanyabikorwa b’Akarere ka MUHANGA, ryabaye kuva tariki ya 3 kugeza tariki ya 7 Kamena 2024, Bureau Social de Développement (BSD) yahawe igihembo nk’umufantanyabikorwa mwiza w’Akarere ka MUHANGA mu iterambere n’imibereho myiza y’imiryango.
Bimwe mu bikorwa BSD yamuritse ifashamo abaturage harimo ibikorwa by’ubuhinzi n’ubworozi aho iha abaturage imirama y’imbiga, ibiti by’imbuto ziribwa n’ibiti bivangwa n’imyaka, imigina y’ibihumyo, imibyare y’insina.
BSD kandi ikurikirana abagenerwabikorwa ibaha ubumenyi mu birebana n’ubuhinzi hagamijwe kongera umusaruro w’ubuhinzi.
Uretse umusaruro w’ubuhinzi wamuritswe, hanamuritswe umusaruro w’ubworozi nawo abagenerwabikorwa bafashwamo na BSD aho bahabwa amatungo : Inka, ingurube, inkoko, Dendo hagamijwe kubafasha kubona indyo yuzuye mu muryango no kongera ubushobozi bw’umuryango mu bijyanye no kwihaza.
Mu bworozi kandi BSD yamuritse umusaruro w’amafi ukomoka ku bworozi bw’amafi bukorwa na Koperative KORA WIGIRE ikorera ubworozi bw’amafi mu gishaga cya NYIRANGARI, ibifashijwemo na BSD.
Uretse ubuhinzi n’ubworozi busanzwe bukorwa n’abagenerwabikorwa, BSD yatangiye kubyaza umusaruro ibikomoka ku buhinzi n’ubworozi. Ni muri urwo rwego ubu yatangiye gukora amasabune yifashishije umusaruro wa Avoka, amasabune akorwa na Koperative AGAKESHA MUBYEYI ibifashijwemo na BSD. Naho kubirebana b’ubworozi abagenerwabikorwa ba BSD batangiye gutunganya amavuta y’inka.
Mu bindi byamuritswe harimo ibikorwa by’abanyeshuri biga mu Ishuri ry’imuga rya BSD, mu Ishami ry’ubutetsi n’ubudozi. [...]
Read more...
April 12, 2021
Byari ibyishimo bikomeye ku miryango 13 y’abagenerwabikorwa ba BSD bo mu murenge wa Nyarubaka basezeranye imbere y’amategeko tariki ya 25/03/2021, nyuma y’igihe kirekire babana mu buryo budakurikije amategeko.
Gusezerana kw’iyi miryango kwabereye imbere y’Umunyamabanga Nshingwabikorwa w’Umurenge wa Nyarubaka ari kumwe n’Umukozi ushinzwe Irangamimerere muri uwo Murenge. Hari kandi na bamwe mu bagize imiryango y’abasezeranye bari baje kwifatanya n’imiryango yabo muri ibyo byishimo.
Iki gikorwa cyo gusezerana imbere y’amategeko, cyakozwe hubahirizwa ingamba zo kwirinda Covid-19, cyateguwe na Bureau Social de Développement (BSD), nyuma yo kubona ko iyo abantu babana batarasezeranye imbere y’amategeko bikurura amakimbirane mu miryango ndetse bikaba imwe mu mpamvu y’imicungire mibi y’umutungo w’umuryango. Ibi bigaterwa ahanini n’uko buri wese yihunza inshingano ze z’urugo, kuko aba yumva ko igihe icyo aricyo cyose urwo rugo yaruvamo akagenda.
Ku birebana no gutegura imiryango, mbere yo gusezerana imbere y’amategeko, BSD yageneye iyo miryango ibiganiro bitandukanye, byose byagarukaga ku ngaruka zo kubana hadakurikijwe amategeko. Muri zo harimo imicungire mibi y’umutungo w’umuryango, kubuza abana uburenganzira bwabo, amakimbirane mu miryango, kubaho umuryango nta cyerekezo ufite n’ibindi…
Nyuma y’ibyo biganiro, imiryango 13 yabanaga idasezeranye yahise ifata icyemezo cyo gusezerana imbere y’amategeko, maze itangira inzira yo gushaka ibyangombwa byo gusezerana.
Mu muhango wo gusezerana, Umunyamabanga nshingwabikorwa w’Umurenge wa Nyarubaka, yabanje kubaha inyigisho zitandukanye zirebana n’imibanire myiza y’abashakanye, abasobanurira uburyo bw’icungamutungo bwemewe mu Rwanda, inyungu ziri mu kubana abantu barasezeranye imbere y’amategeko, haba ku bashakanye ubwabo, ku muryango nyarwanda, ndetse no ku gihugu muri rusange. Maze aboneraho kubibutsa ko kugirango imiryango yabo itere imbere bagomba kubana neza.
Ikindi gikorwa cyabaye uwo munsi ni icyo kwitura, aho abagenerwabikorwa ba BSD batatu bari barahawe inka mu mwaka wa 2019, bituye bagenzi babo bari batarizihabwa. Ibi bikaba bikorwa mu rwego rwo gukomeza koroza inka abagenerwabikorwa, aho abahawe inka na BSD ku nshuro ya mbere, iyo zibyaye, bitura bagenzi babo baba batarazihabwa. [...]
Read more...